उपाकलं सायाः नरसिंह जात्रा पिदन
यल – दँय्दसं गुंलागा पंचमि (भदौ कृष्ण पंचमि) कुन्हु न्यायेका वयाच्वंगु उपाकलं सायाः नरसिंह जात्रा थुगुसी नं न्यायेकल । थुगुसी थुगु जात्रा पट्को त्वाःया ध्रुवज्वालानन्द शुक्ल राजोपाध्यायं न्यायेकादीगु खः । थनया राजोपाध्याय समुदायया उपाकर्म गुथिइ ज्येष्ठताया आधारय् न्यायेकेगु याना वयाच्वंगु थुगु जात्रा थुगुसी ध्रुवज्वालानन्दया छेँय् नं संचालन याःगु खः ।
तसकं वा वयाच्वंसां संचालन जूगु थुगुसीया जात्राय् पाःलाःया पुरोहित, जिलाजं व भिंचामध्ये छम्हेसित नरसिंह दयेकेगु परम्पराकथं थुगुसी पाःलाःया जिलाजं ख्वपया खौमा त्वालय् च्वंम्ह मनिन्द्रराज राजोपाध्याययात नरसिंह दयेकाः जात्रा पिथनाः यलया सायाः न्ह्याइगु लँपुया परिक्रमा याकूगु खः ।
पाःलाःया छेँय् नं न्ह्याःगु नरसिंह जात्रा यलया प्राचीन नगरया लँपु चाःहिलाः पाःलाःया हे छेँय् थ्यंकाः क्वचायेकूगु खः । नरसिंहयात न्याज्वः अप्सरा, लक्ष्मी, सरस्वति व प्रल्हादया लिसें नगर चाःहिकेगु परम्परा दु । जात्राय् अप्सराया जोडीलिसें दण्डसहित छज्वः, अथे हे छज्वलं पंचामृत ह्वलाः तुफि, च्वाम्वः पंखा ज्वनातःम्ह छम्ह व लावा ह्वलाः वनीम्ह छम्हलिसें न्याज्वः अप्सरा वनेगु याइ ।
नरसिंहया जवंखवं लक्ष्मी व सरस्वति च्वनेगु याइसा प्रल्हादं धुं ज्वनाः नरसिंहयात स्वयाः अःखवतं पलाः न्ह्याकाः वनी । थीथी सांस्कृतिक बाजं व लाखेलिसें पिहां वःगु नरसिंह जात्रा दर्शन व पुजा याइपिं आपालं दुगु खः । थुगु जात्रा थौं स्वयां ३८७ दँ न्ह्यः न्ह्याःगु आतकया प्रमाण लूगु स्थानीय संस्कृतिविद् नापं जात्रा विज्ञ हेरम्बानन्द राजोपाध्यायं कनादिल ।
यल देशय् निम्ह नरसिंह विराजमान जुयाच्वंगुया रुपय् कायेगु याः । छम्ह कात्तिक प्याखनय् पिहां वइम्ह खःसा मेम्ह सायाःया इलय् पिहां वइम्ह खः । कात्तिक प्याखनय् पिहां वइम्ह नरसिंहयात उग्ररुपया कायेगु यानातःगु दुसा सायाःया इलय् पिहां वइम्ह नरसिंहयात शान्त रुपया कायेगु याः ।
स्रोत : http://nepalbhasatimes.com/11660
स्रोत : http://nepalbhasatimes.com/11660
No comments:
Post a Comment