राजोपाध्याय समाजं गुरुशेखरयात श्रद्धान्जलि प्वंकल ।
नेवा: अनलाइन न्युज – बिराजकाजी राजोपाध्याय | २०७२ भाद्र ७, सोमबार २३:१३:५४
राजोपाध्याय समाजं पण्डित गुरुशेखर राजोपाध्याययात श्रद्धान्जलि देछाःगु दु । समाजं येँय् श्रद्धान्जलि सभाया ग्वसाः ग्वयाः अध्ययन, अनुसन्धानया ख्यलय् तःधंगु योगदान बियादीम्ह मदुम्ह पण्डित राजोपाध्याययात बिचाः हायेकूगु खः ।
समाजया नायः बदन ज्वालानन्द राजोपाध्यायया सभानायकय् जूगु श्रद्धान्जलि सभाय् समाजया न्वकू अमरराज राजोपाध्यायजुं मदुम्ह पण्डित राजोपाध्यायया जीवनि ब्वनाः न्यंकादीगु खः ।
ज्याझ्वलय् अनुसन्धाता काशिनाथ तमोट, नव्यन्यायाचार्य गोविन्द भक्तानन्द राजोपाध्यायलिसें वरिष्ठ समाजसेवी शिव श्रेष्ठजुं मदुम्ह पण्डित राजोपाध्यायया बारे थःथःगु अनुभव व बिचार प्वंकादीगु खः । लिसें मदुम्ह राजोपाध्यायया काय् मनोज राजोपाध्यायजुं थः अबुजुया बारे खँ तयादीगु खः ।
उगु हे ज्याझ्वलय् पर्व सुधार समितिया दुजः हरिनारायण मन्डलजुं समितिं पर्व सुधार सम्बन्धि तयार याःगु प्रतिवेदन मदुम्ह पण्डित गुरुशेखरजुया काय् मनोज राजोपाध्यायलिसें समाजयात नं लःल्हानादिल सा वैदिक प्रतिष्ठानपाखें प्रतिष्ठानया महासचिवं मदुम्ह राजोपाध्यायया काय् मनोज राजोपाध्याययात श्रद्धान्जलि पौ देछाःगु खः ।
ज्याझ्वलय् मदुम्हेसिया आत्माया चीर शान्तिया कामना यासें छगू मिनेट मौन धारण याःगु खः । ज्याझ्वः वन्दना राजोपाध्यायं न्ह्याकादीगु खः ।
फोटो ग्वाहालि ः मेमोरी जोनपाखें आकाश राजोपाध्याय
source: http://www.newaonlinenews.com/%E0%A4%B0%E0%A4%BE%E0%A4%9C%E0%A5%8B%E0%A4%AA%E0%A4%BE%E0%A4%A7%E0%A5%8D%E0%A4%AF%E0%A4%BE%E0%A4%AF-%E0%A4%B8%E0%A4%AE%E0%A4%BE%E0%A4%9C%E0%A4%82-%E0%A4%97%E0%A5%81%E0%A4%B0%E0%A5%81%E0%A4%B6%E0%A5%87%E0%A4%96%E0%A4%B0%E0%A4%AF%E0%A4%BE%E0%A4%A4-%E0%A4%B6%E0%A5%8D%E0%A4%B0%E0%A4%A6%E0%A5%8D%E0%A4%A7%E0%A4%BE%E0%A4%A8%E0%A5%8D%E0%A4%9C%E0%A4%B2%E0%A4%BF-%E0%A4%AA%E0%A5%8D%E0%A4%B5%E0%A4%82%E0%A4%95%E0%A4%B2-%E0%A5%A4
