Friday, September 18, 2015

Rajopadhyaya in News : राजोपाध्याय समाजया फोटोग्राफि तालीम उलेज्या

राजोपाध्याय समाजया फोटोग्राफि तालीम उलेज्या



नेवा: अनलाइन न्युज – बिराजकाजी राजोपाध्याय | २०७२ आश्विन १, शुक्रबार २०:१३:२५
राजोपाध्याय समाजया ग्वसालय् जुइत्यंगु फोटोग्राफि तालीमया उलेज्या जूगु दु । 
येँय् जूगु ज्याझ्वलय् जर्मनीयाम्ह रेडियोकःमि मय्जु एन्जेलिका स्कुल्जं सुकुन्दाय् मत च्याकाः तालीमया उलेज्या यानाद्यूगु खः । समाजया नायः वदन ज्वालानन्द राजोपाध्यायया सभानायकय् जूगु ज्याझ्वलय् वरिष्ठ फोटो पत्रकार लिसें नेपाल फोटो पत्रकार संघया नायः राजभाइ सुवालं बांलाःम्ह फोटोग्राफर जुइत तालीम व ज्ञानया लिसें दृढ इच्छा नं दयेमाःगु खँ धयादीगु खः ।

ज्याझ्वलय् मू प्रशिक्षक विमल चन्द्र शर्मा राजोपाध्यायं न्हापा क्वचाःगु तालीमया बारे जानकारी बियादीगु खःसा पुलांपिं प्रशिक्षार्थिपिन्सं थःगु अनुभव तःगु खः ।

अथे हे समाजया मू छ्यान्जे संजय शर्मा राजोपाध्यायं प्राविधिक ख्यलय् नं दक्ष राजोपाध्याय जनशक्ति उत्पादन यानावनेत समाजं थज्याःगु तालीमत बिया वनेगु खँ तयादीगु खः । 
सभानायःया थासं समाजया नायः बदन ज्वालानन्द राजोपाध्यायं कर्मकाण्ड, संस्कारया गुरु पुरोहित जुयाच्वंपिं राजोपाध्यायत आः ई कथं प्राविधिक ख्यलय् नं दक्ष जुया वनेमाःगु खँय् बः बियाद्यूगु खः ।

ज्याझ्वलय् मू पाहां मय्जु एन्जेलिकायात मतिनाया चिं कथं गणेद्यः नं देछाःगु खः ।
Source: http://www.newaonlinenews.com/%E0%A4%B0%E0%A4%BE%E0%A4%9C%E0%A5%8B%E0%A4%AA%E0%A4%BE%E0%A4%A7%E0%A5%8D%E0%A4%AF%E0%A4%BE%E0%A4%AF-%E0%A4%B8%E0%A4%AE%E0%A4%BE%E0%A4%9C%E0%A4%AF%E0%A4%BE-%E0%A4%AB%E0%A5%8B%E0%A4%9F%E0%A5%8B%E0%A4%97%E0%A5%8D%E0%A4%B0%E0%A4%BE%E0%A4%AB%E0%A4%BF-%E0%A4%A4%E0%A4%BE%E0%A4%B2%E0%A5%80%E0%A4%AE-%E0%A4%89%E0%A4%B2%E0%A5%87%E0%A4%9C%E0%A5%8D%E0%A4%AF%E0%A4%BE