राजोपाध्याय समाजपाखें विरोध

Posted on Mon Jan 5, 2009 8:28 pm NST

पशुपति विदेशी भट्टया थासय् नेपाली भट्टया नियुक्ति जूगु खँयात कयाः राजोपाध्याय समाजया गम्भीर ध्यानाकर्षण जूगु खँ धाःगु दु । समाजं छगू प्रेस विज्ञप्ति पितबिसें पशुपतिइ विदेशी मूलया पुजारी जुइगु धइगु विदेशी हैकमपूर्ण खँ जूगु धासें नेपाली पुजारी नियुक्ति यायेगु धइगु वर्तमान इलय् उचित संवोधन जूगु खँ धयातःगु दु ।

प्रेस विज्ञप्तिइ मुलुक संघीयता पाखे वनाच्वंगु इलय् क्रान्तिकारी धयाच्वंगु सरकारं संघीयता व अग्राधिकाया अःखः थःपिंसं हे निम्ह ब्रम्हुतय्त नियुक्त यायेगु धइगु खस अहंकारवादयात हे तिबः जुइ कथं ज्या जूगु व थुकिं संघीयताया वकालत याइगु पार्टीयात मल्वःगु खँ नं उगु प्रेस विज्ञप्तिइ न्ह्यथनातःगु दु ।

पशुपतिइ नेपाली ब्राम्हणया थासय् नेवाः ब्राम्हण नियुक्ति यायेमाःगु माग यासें उगु प्रेस विज्ञप्तिइ इतिहासय् पशुपतिया मूल पुजारी राजोपाध्याय नेवाः ब्राम्हण जुया वयाच्वंगुलिं यक्ष मल्लया पालाय् शंकराचार्यया लिधंसाय् पित्यंपिं राजोपाध्याय ब्राम्हणतय्त हे नियुक्ति यायेमाःगु माग यानातःगु दु । राजोपाध्याय समाजया नायः बदनशर्मा राजोपाध्यायं हस्ताक्षर यानाः पिथनादीगु उगु प्रेस वक्तव्यय् सरकारया नियुक्ति प्रक्रियाय् विरोध प्वंकूसें उगु नियुक्तिया विरोध याःपिं सकल भण्डारीतय्त सुभाय् नं देछाःगु दु । नापं थुगु संघर्षय् राजोपाध्याय समाजयापाखें फुकसितं उगु ब्वति कायेत नं आह्वान याःगु दु ।

Source:

http://www.nepalmandal.com/content/572.html