नेवा: अनलाइन न्युज – राजीव राजोपाध्याय | २०७५ आश्विन २५, बिहिबार १७:०९:२०
यल महानगरपालिकाया वला महाद्यःननि निवासी कृष्ण देगः लिसें पूर्णचण्डी पुजारी व कातिप्याखंया गुरु लिसें नृसिंहया भूमिका तकं निरन्तर रुपं निर्वाह यानाः वयाच्वंपिं राजोपाध्याय ब्राम्हण छेँजःया वला महाद्यःननि चुकया आगंछेँ संकटय् लाःगु दु ।
वर्तमान इलय् महाद्यःननि चुकय् च्वंगु ऐतिहासिक व सांस्कृतिक महत्व कुबियाच्वंगु, थीथी पर्वय् लिसें कातिप्याखंया इलय् तकं तान्त्रिक विधिपाखें गोप्य पूजा क्वचायेकेमाःगु आगंछेँया अस्तित्व संकटय् लाःगु जानकारी रविन्द्रधर शर्मा लिसें वला महाद्यःननि आगं गुथिया सकल गुथ्याःपिन्सं मंकाः कथं ल्हाःचिं तयाः छगू विज्ञप्ति सार्वजनिक याःगु दु ।
वय्कःपिन्सं उगु आगंछेँया अवस्था संकंटय् लाःगुलिं चिन्ता नं प्वंकातःगु दु उगु विज्ञप्तिइ ।
उगु विज्ञप्तिइ धयातःगु दु, “यल महानगरपालिका वडा ल्याः १९ य् च्वंगु वला पूर्णचण्डीइ च्वंगु कित्ता नम्बर ३ जिमिगु निजी आगंछेँ जग्गा नापंच्वंगु संधियार चन्द्रकुमारी श्रेष्ठ व कविता श्रेष्ठं छेँ दयेकूगु इलय् जानकारी तकं मब्यूसे आगंंछेँया निजी जग्गायात सार्वजनिक चोक धकाः न्ह्यथनाः अनियमित तरिकां छेँ निर्माण यानाच्वंगु दु । उकिं यानाः उगु आगंछेँय् थीथी इलय् जुइगु तान्त्रिक पूजाय् तकं लिच्वः लाइगु जूगु दु ।”
थुगु खँया जानकारी बिहिवाः छगू पत्रकार सम्मेलन यानाः जानकारी ब्यूगु खः ।
सार्वजनिक याःगु विज्ञप्तिइ उगु विषयस माःगु कथं पलाः न्ह्याकाः सांस्कृतिक, ऐतिहासिक महत्वया आगंछेँया सुरक्षा यानाबिइत यल महानगरपालिका १९ वडाया वडाध्यक्ष विनोद ताम्राकारयात जानकारी बियाः संधियार पौ उपलब्ध मयाकूगु हुनिया विषयस न्यनेकने याःबलय् सार्वजनिक चुक जूगु हुनिं जानकारी बिइम्वाःगु धकाः गैरजिम्मेवारीपूर्ण लिसः ब्यूगु खँ न्ह्यथनातःगु दुसा आगंछेँया संरक्षणया नितिं वडाध्यक्ष ताम्राकारपाखें छुं नं ग्वाहालि मजूगु खँ नं न्ह्यथनातःगु दु ।
यल महानगरपालिकाय् हे वनाः उगु अनियमित निर्माण रोक्का यायेत राजोपाध्याय समुदायं निवेदन तकं ब्यूगु खः । निवेदन ब्यूसां नं ऐतिहासिक व सांस्कृतिक सम्पदाया संरक्षण यायेमाः धकाः भाषण बिइगु महानगरपालिका हे भक्षक जुया लालपूर्जा मदूगु धकाः यल महानगरपालिकां निवेदन खारेज याःगु खँ नं विज्ञप्तिइ न्ह्यथनातःगु दु ।
विज्ञप्तिइ फिल्डबुकय् आगंछेँया उगु क्षेत्रयात स्पष्ट रुपं जग्गा धकाः उल्लेख दूगु व ०६८ सालय् लालपूर्जा पिकायेगु नितिं प्रक्रिया न्ह्यःने यंकाः ३५ दिं सुचं तकं प्रकाशन जुइधुंकूगु व आः लालपूर्जाया सकतां ज्या रोक्का जुयाच्वंगु अवस्थाय् नं स्मरण याकाच्वना धकाः धयातःगु दु ।
लालपूर्जा रोक्का जुयाच्वंगु इलय् मेमेगु छुं उपाय मदयाः सांस्कृतिक व ऐतिहासिक सम्पदा कुबियाच्वंगु महाद्यःननि आगंछेँया संरक्षणया नितिं अनियमित निर्माण व यल महानगरपालिका विरुद्ध अदालत वनेत वाध्य जूगु दु धकाः नं विज्ञप्तिइ न्ह्यथनातःगु दु ।
विज्ञप्तिइ अनियमित निर्माणयात रोक्का यानाः महाद्यःननि आगंछेँया संरक्षणया नितिं अदालतय् मुद्दा दायर यायेत प्रक्रिया न्ह्यने यंकेधुनागु जानकारी बिसें स्थानीय तहपाखें छुं ग्वाहालि मजूगु अवस्थाय् न्यायालयपाखें न्याय जुइगु खँय् न विश्वस्त जुयाः न्ह्यथनातःगु दु ।
विज्ञप्तिइ उगु ज्याय् ग्वाहालि यायेत त्वाःबासी, त्वाःलिसे सरोकार तइगु थीथी संघसंस्था, बुद्धिजिवी, पत्रकार, पुरातत्व विभाग लिसें फुक्क सरोकारवाला निकाययात रविन्द्रधर शर्मा लिसें वला महाद्यःननि आगंछेँया सकल गुथ्याःपिन्सं इनाप याःगु दु ।
No comments:
Post a Comment