Rajopadhyaya in News : मरुसतः पुनःनिर्माणया नितिं क्षमापूजा क्वचाल

मरुसतः पुनःनिर्माणया नितिं क्षमापूजा क्वचाल

नेवा: अनलाइन न्युज | २०७५ बैशाख ३१, सोमबार १४:५०:०७

वंगु स्वदँ न्ह्यः २०७२ बैशाख १२ गते ब्वःगु तःभुखाचं पूर्णरुपं क्षति जूगु येँया बसन्तपुर लागाय् च्वंगु मरुसतः (काष्ठमण्डप) पुनःनिर्माण यायेगु नितिं मरुसतः पुनःनिर्माण उपभोक्ता समितिया ग्वसालय् थौं सोमवाः सुथय् तःजिक क्षमापूजा ज्याझ्वः न्ह्याकूगु दु ।

बौद्धधर्मया बज्रयान विधि कथं व हिन्दुधर्मया राजोपाध्यायपिनिगु विधि कथं पूजाआजा यानाः जूगु उगु क्षमापूजा समितिया कजि लिसें येँ क्षेत्र नम्बर ८ पाखें निर्वाचित जनप्रतिनिधि प्रदेश नम्बर ३ या सांसद राजेश शाक्यपाखें न्ह्याकूगु खः ।

क्षमापूजाय् वाङमय शताब्दी पुरुष संस्कृतिविद् डा. सत्यमोहन जोशी विशेष पाहाँ कथं झायादीगु खःसा पर्यटन नागरिक उड्डयनलिसें संस्कृति मन्त्री रवीन्द्र अधिकारी मूपाहाँ कथं झायादीगु खः । अथेहे, ज्याझ्वलय् प्रतिनिधिसभाया सांसद कृष्णगोपाल श्रेष्ठया नं विशेष उपस्थिति दूगु उगु ज्याझ्वलय् पाहाँ कथं, प्रदेश ३ या भौतिक पूर्वाधारमन्त्री केशव स्थापित, येँ महानगरपालिकाया मेयर विद्यासुन्दर शाक्य, उपमेयर हरिप्रभा श्रेष्ठ खड्गीलिसें थीथी ख्यःया व्यक्तित्वपिं झायादीगु खः ।

ज्याझ्वलय् क्षमापूजा क्वचायेकाः नुगःखँ तयेगु ज्याझ्वलय् विशेष पाहाँ कथं झायादीम्ह वाङमय शताब्दी पुरुष डा. सत्यमोहन जोशीं मरुसतःया ऐतिहासिक पक्षयात कयाः नुगःखँ तयादीगु खःसा मरुसतः नेपाःया म्हसीका बियाच्वंगु महत्वं जाःगु सम्पदा जूगु खँ कनादीगु खः ।

अथेहे, मूपाहाँ कथं झायादीम्ह नागरिक उड्डयन व संस्कृति मन्त्री रवीन्द्र अधिकारीं मरुसतःया पुनःनिर्माण याकनं क्वचायेकेमाःगु खँ कनादिसें पुनःनिर्माणया नितिं नेपाल सरकारपाखें माक्व ग्वाहालि यायेत तयार जूगु खँ कनादीगु खः ।

ज्याझ्वलय् नुगःखँ तयेगु झ्वलय् येँ महानगरपालिकाया मेयर विद्यासुन्दर शाक्यं मरुसतःया आः पुनःनिर्माण ज्या निरन्तर रुपं न्ह्यानाः इलय् हे पूवनीगु खँ न्ह्यथनादिसें मरुसतः पुनःनिर्माणया नितिं सकतां कथंया ग्वाहालि येँ महानगरपालिकां यायेगु जुइ धकाः बचं बियादीगु खः ।

थौं सोमवाः मरुसतः पुनःनिर्माणया नितिं जूगु क्षमापूजा ज्याझ्वलय् मरुसतः पुनःनिर्माण समितिया संयोजक ३ नम्बर प्रदेशया सांसद राजेश शाक्यं मरुसतः स्वनिगः व नेपाःया जक मखुसे विश्वन्यंकंया हे विश्व सम्पदा जूगु हुनिं मरुसतः पुनःनिर्माणया नितिं स्वनिगःया बासिन्दा, नेपाःया जनता जक मखु सकल विश्वन्यंकंया जनसमुदाय व संघसंस्थां ग्वाहालि यायेमाःगु खँ कनादिसें प्यदँया दुने मरुसतः पुनःनिर्माण ज्या क्वचायेकेगु प्रतिबद्धता प्वंकादीगु खः ।

समितिया कजि शाक्यं आः मरुसतः पुनःनिर्माण ज्या मदीगु व निरन्तर रुपं न्ह्याइगु खँय् निगूमत मदूगु खँ कनादिसें तःभुखाचं पूर्णरुपं दुनावंगु मरुसतः छुं दँ लिपा हाकनं मरुसतः धस्वाइगु सकस्यां स्वयेखनीगु खँ कनादीगु खः ।

उगु ज्याझ्वलय् येँया १८, १९,२०, २३, २४, २५, २७ लिसें थीथी वडाया वडाध्यक्षपिं नं उपस्थित जुयादीगु खःसा आपालं जनसमुदाय व थीथी संघसंस्थाया प्रतिनिधिपिनिगु उपस्थिति दूगु खः ।

किपाः प्रेरणा शाक्य
source: http://www.newaonlinenews.com/%E0%A4%AE%E0%A4%B0%E0%A5%81%E0%A4%B8%E0%A4%A4%E0%A4%83-%E0%A4%AA%E0%A5%81%E0%A4%A8%E0%A4%83%E0%A4%A8%E0%A4%BF%E0%A4%B0%E0%A5%8D%E0%A4%AE%E0%A4%BE%E0%A4%A3%E0%A4%AF%E0%A4%BE-%E0%A4%A8%E0%A4%BF%E0%A4%A4%E0%A4%BF%E0%A4%82-%E0%A4%95%E0%A5%8D%E0%A4%B7%E0%A4%AE%E0%A4%BE%E0%A4%AA%E0%A5%82%E0%A4%9C%E0%A4%BE-%E0%A4%95%E0%A5%8D%E0%A4%B5%E0%A4%9A%E0%A4%BE%E0%A4%B2